「同題異寫 ‧ 兩種風景」作者團隊由五位背景不同的校友組成。專欄每期設一題目，由兩位作者各出機杼，自由發揮。五人輪流執筆，每次不同組合，期盼刷出寫作的新火花。
本期作者 楊思毅（17 ／政治與行政學）
喺香港土生土長嘅複雜性創傷後壓力症候群（Complex PTSD）倖存者。二○一二年入新亞後，有幸結交到嚟自五湖四海嘅好朋友、職員同老師，令佢即使跌跌碰碰，都有人互相扶持。臨畢業前，由於一位好朋友自殺身亡，加上家庭同學校嘅童年創傷，令佢對心理、輔導學同情緒教育漸漸產生興趣，後來加入Teach For Hong Kong 喺基層小學教咗一年書，望到唔少學生同佢細個好似，因為屋企同學校冇教，所以唔識講自己感受，影響社交同學習。二○一八年，佢同另外兩位中大校友創立非牟利機構JUST FEEL 感講，希望喺香港學校同家庭推廣「善意溝通」同「社交情緒教育」，凡事「先處理心情，再處理事情」，令每個小朋友成長得更幸福。
二〇二〇年
Tom 一打開 WhatsApp 就見到 John 嘅訊息：「不如我哋星期四下晝開會傾？」
Tom 二話不說，即刻打開 Google Calendar 望吓自己星期四下晝有咩做，發現自己成個下晝都一早安排咗會議，然後見大家星期五下晝都得閒，於是回覆：「我 calendar 上 mark 咗星期四下晝有其他活動。不如星期五下晝開？」John 隔一陣之後回覆：「okok」。
Tom 三思之後，覺得如果 John 之後都係咁，會為佢帶嚟困擾，長遠會影響合作，所以搵當初同佢一齊請 John 返嚟嘅 Phoebe 呻，Phoebe 就話：「係唔係你自己冇同佢講清楚？你可以試吓同佢講清楚，我哋講好咗係平等嘅協作關係呢。」Tom 聽完之後，感到非常自責，心諗自己係咪可以做得更好呢？佢決定返去反思、學習吓自己可以點樣表達得更好。
Tom 四處求助，但都係冇乜進展，感到更加苦惱同無助。
二〇二一年
Tom 一打開 WhatsApp 就見到 John 嘅訊息：「不如我哋星期四下晝開會傾？」
Tom 二話不說，即刻打開 Google Calendar 望吓自己星期四下晝有咩做，發現自己成個下晝都一早安排咗會議，於是回覆：「我 calendar 上 mark 咗星期四下晝有其他活動。請你約會議時間嗰陣，可以先睇吓我嘅 calendar 嗎？我哋一開始互相 share calendar，協議咗大家約時間嗰陣都會先留意其他人嘅時間，嘗試搵大家都可行嘅時間先約，就係想一齊提高協作效率。你同意嗎？」John 隔一陣之後回覆：「okok」。
Tom 三思之後，覺得如果 John 之後都係咁，會為佢帶嚟困擾，長遠會影響合作；同時佢又想畀 John 可以參與多啲，驚 John 冇得參與嘅話會唔開心，同埋驚 Phoebe 會再次質問佢點解約開會約到咁亂，所以決定搵 Phoebe 單聲先。Phoebe 就話：「係唔係你冇同佢真誠咁表達你嘅感受同需要？同埋你最需要諗嘅係，件事點樣先做得好，而唔係 John 嘅感受呢。」Tom 聽完之後，感到非常苦惱，心諗係咪自己可以做得更好呢？自己有冇忽略咗件事，而過份重視 John 嘅感受呢？佢決定返去反思、學習吓自己可以點樣表達同處理得更好。
Tom 四處求助，但都係冇乜進展，感到更加困擾同失望。
二〇二二年
Tom 一打開 WhatsApp 就見到 John嘅訊息：「不如我哋星期四下晝開會傾？」
Tom 二話不說，即刻打開 Google Calendar 望吓自己星期四下晝有咩做，發現自己成個下晝都一早安排咗會議，於是回覆：「你又冇睇我calendar 就揀個我一早安排咗會議嘅時間開會，我頂你唔順喇！我好嬲，好困擾呀！我想有效地協作，同埋想知你到底想點樣合作㗎？呢樣嘢都講咗幾年，你之前都話『okok』，講完之後又冇改變，如果你唔ok 不如你直接講你唔 ok，好過畀錯誤期望我呀！」John 隔一陣之後回覆：「okok」。
Tom 三思之後，覺得如果 John之後都係咁，會為佢帶嚟困擾，長遠會影響自己嘅精神健康，同時佢又擔心如果同 John 嘅衝突升溫，會影響到團隊嘅和諧，所以佢決定都係繼續好似做秘書咁夾期約開會先，然後再搵 Phoebe 講佢嚟頂唔順，想 Phoebe 拯救佢。Phoebe 就話：「咁小事都頂唔順？你可以唔預佢開會㗎，你亦都唔需要做佢秘書。」Tom 聽完之後，感到非常憤怒，心諗：「John咁耐先同你開一次會，你梗係冇問題啦。你試吓每星期發生一次，我就唔信你頂得順。」但 Tom 真係唔想再有衝突，所以決定忍住唔講。
Tom四處求助，但都係冇乜進展，感到更加不忿。
二〇二三年
Tom 一打開 WhatsApp 就見到 John嘅訊息：「不如我哋星期四下晝開會傾？」
Tom 二話不說，即刻深呼吸十下，然後打開 Google Calendar 望吓自己星期四下晝有咩做，發現自己成個下晝都一早安排咗會議。雖然佢早有準備，估到件事會咁發生，但到佢確認咗嗰陣，佢依然有反應—心口好翳悶，覺得呼吸唔太順暢，手震震地打咗一個訊息：「有冇搞錯呀，你淨係識得害我。︿＃＃！＄＆︿＃＄！＄！︿……」
Tom 三思之後，決定都係唔回覆，於是刪除咗佢打嘅文字。
Tom 感到好絕望，今次佢冇搵 Phoebe 呻，因為佢知講嚟都嘥氣。佢知道自己今次真係頂唔順了，佢熄手機，喺個位嗌咗一句：「我頂唔順喇！」然後佢離開公司，去咗樓下公園邊狂奔邊爆粗，嗌到旁人都以為佢係痴線嘅。（又咁講，其實Tom 呢一刻都真係痴咗線。）佢覺得自己係一個絕望嘅受害者，冇嘢可以做，佢只想怪責其他人點解唔幫佢……
二〇二四年
Tom一打開 WhatsApp 就見到 John嘅訊息：「不如我哋星期四下晝開會傾？」
今次，佢冇再當自己係受害者，亦有再怪責其他人。佢終於為自己嘅感受同需要負上責任。佢鼓起勇氣，決定回覆 John：「今次會議我哋處理好同埋分咗工了，所以唔駛麻煩你約會同參加會議。」John回覆：「okok」。Tom 睇到之後，倒抽一口涼氣。原來咁輕鬆就可以解決咗個問題。
Tom 醒覺原來一直以嚟，佢先係最有問題、最需要改變嗰個人—佢因為驚衝突、驚拒絕人，所以好多嘢都收收埋埋唔講，又或者過份地關注其他人嘅感受、需要，而長期忽略咗自己內心嘅聲音。佢嘅功課，唔係再怪責其他人，而係學識聆聽、尊重自己嘅心。佢諗諗吓，忍唔住笑咗出聲，心諗：「三十歲人先察覺到呢樣嘢，應該唔算太遲掛？」
（ 文 ／楊思毅 ）
本期作者王昱珊（18／藝術）
於日常之間翻來覆去。主修藝術，副修中國語言及文學，畢業後與友人合租城內小小空間，延續創作壽命。喜歡窺探他人（包括自己）的生活，從中探索人的處境狀態、精神情緒和關係距離。以觀人的方式觀世界。
鐘的針每跳動一刻就體現時間過渡的一瞬。
昏熱的空間，涼不了的冷氣風，摺皺的薄被單，輾轉的身軀。記憶中揮之不去的話語重重複複地上演，以難以對抗的力度，衝擊平伏不下的心。你想過千萬種回應的方法，但那只是事後的靈光一現再現。在回家的路上，在浴室，在鏡前，冒汗與顫抖。身體似乎會作出最誠實的反應。
你並不想這樣。浮現的臉孔，臉孔上的臉容，臉容伴隨的態度，態度中的情緒，情緒換來的情緒，大概就是根源。找到這樣的根源卻無法解結，因為根源就是結果，那是不能逆轉的事實本身。烙印在記憶而成為了身體的記憶，在無時無刻或無關痛癢的時刻，臉孔還是會出現，提醒你，仍在，仍在。你並不想這樣。
燈滅的夜不算黑，熟悉的氣味讓空間顯得不至於陌生，游離的輪廓線條勾勒出空間中的物，褪了彩度，省略了多餘的色彩，你似乎終於能夠看見物像的本原形態。當你專注地凝視異狀的某個物，視野周邊的黑便會往中心蔓延，僅剩物與你。
你問物：「你可看見本真的我的形態？」
回道：「一頭狗，一條蠕動的毛蟲，一坨軟糯的團塊。」「或者是一磚快融掉的空氣，一灘滲透在床墊上的尿漬。」「細胞，分子，原子。」
夜裏的夢很嘈雜。說是收音機未有扭對台上的白噪聲又太過鮮活，總之是一陣難以入耳的嗓音。叫罵的、詛咒的、嚎啕的、兇惡的、厭惡的，衝擊耳膜的韌度，身體會本能地想要躲避，往逃離的一方奔跑，逃命地跑，雙腿卻似銬上了千斤重的地心吸力，拖慢逃亡的進度，甚至，聲音即將要以覆膜的形態，吞噬整個肉身。
跑呀跑呀跑呀跑呀跑呀跑呀跑呀跑呀跑 — 一躍 —
躍到一處山的頂峰，峰上有些人。一個扣上金頸環的人，昂首板臉，雙手猛力搖着小小的旗，誓要將旗搖動得發出「嚯嚯」聲音，不過一手便能掌握的旗要用上兩隻手去搖動，使得身軀有點扭捏。金環者喝令面前一群能雙腿走動的嬰孩列隊。這些嬰孩裸着滑脫脫的身子，有些長得高一點，有些長得胖一點，左顧右盼，看到高大粗壯的樟樹，樹上搖曳的葉，葉間透露的光，光照耀渲染的草坪，坪上的短草，草上的紅甲蟲家族，就是沒有看到那揮動的小旗。
一股強風襲來，風吹葉落，嬰孩們笑了，步履輕盈活潑起來，脫離了本來的列隊，繞着大樹起舞。金環者咬牙切齒，紮着馬步，呼喝嬰孩回來，雙手繼續賣力地揮舞小旗子，旗子在峰的頂點受最高風速吹打，旗布逐漸從杆上撕開，嗖的一聲便旋捲在風中，飛走了。金環者的姿勢定格，雙手持着一支短杆，屁股拋在右後方，氣急敗壞。
小旗布在風中打轉，同時把濃煙、槍火、酒肉、鳥屍、枯葉、塵埃，以及你，一併捲來。如果尚有臉皮的話，臉皮大概就是被拍打得像摺皺了的薄餅；如果尚有意識的話，意識大概就是跑了氣的吹脹氣球在空中亂飛（從風的軸心抽離一秒，乍看是一物）。在風沒那麼強的地域，一切解體降落，各安天命。
落在某處冰潔的平地上，地面如鏡，將天上的陽光完全反照，銳利刺眼的光又劃過你的腦內記憶，那些臉孔欲欲浮現卻又似安上了一層濾鏡，輪廓模糊。你不欲深究也無法深究，那些都是甚麼臉容你無從稽考，反正不重要。隨之以來，是體內無可制止的反胃，因着反胃而瘋狂地嘔吐，每一次反胃與嘔吐，反胃與嘔吐，均驅使你發出如嬰孩嚎哭的叫喊聲，此起彼落，黃的、綠的、黏稠的、發臭的灑落一地，覆蓋了一格格亮麗而光滑的白階磚。
（ 文／王昱珊 ）
