六月‧ 芝加哥

「點解你啱啱第一下見我嗰陣唔攬我？你係唔係唔鍾意我？」[1]Lucy 一臉不解咁問Ray。「唔係呀……我只係……」Ray 聽到Lucy 咁問，呆咗喺度唔識反應。「咁點解？」Lucy 繼續追問。「喺香港同一個女性朋友見面嗰陣無啦啦攬，俾人告非禮都似。我又點會唔鍾意妳呢？」Ray 尷尬地說。「咁你依家喺芝加哥呀嘛！」Lucy 聽到Ray 咁講，即刻由原本嘟嘴，變到甜絲絲地笑。Lucy張開雙手，Ray 戰戰兢兢地行近Lucy，兩人相擁一刻，彼此心跳加速，小鹿亂撞，世界彷彿得返佢哋兩個咁。十分鐘後，佢哋鬆開緊抱彼此嘅雙手，望住彼此嘅瞳孔，靜默。

「我哋返屋企先啦！你咁早喺紐約過嚟一定好攰啦。」Lucy 打破沉默。「嗯。」Ray 跟隨 Lucy 嘅腳步坐火車返屋企，Ray 仲挨住Lucy瞓到成隻豬咁。返到屋企擺底袋之後，Lucy 就車Ray 去芝加哥當代藝術館——Lucy 成長嘅地方。「我高中嗰陣參加咗個學生計劃，每星期嚟呢度跟唔同嘅老師上堂，學習欣賞、創作不同嘅藝術，令我對藝術逐漸產生興趣呢。」

Lucy好熱情咁帶住Ray 參觀藝術館不同角落，向Ray 訴說佢嘅成長故事。Ray 盡力地聽Lucy 快到好似子彈咁嘅英文，理解、吸收、嘗試記住——其實佢已經好攰，加上中學視藝科老師早已摧毀咗佢對藝術嘅喜好，所以對佢嚟講都唔容易。不過好彩佢入新亞之後受藝術系嘅朋友感染，慢慢對藝術無咁抗拒——更加重要嘅係，Lucy 喺二月時已經帶過Ray同其他新亞嘅YUNA 參加者行耶魯大學美術館、紐約大都會藝術博物館，同埋紐約現代藝術博物館。Ray 嗰陣全程黐住Lucy 聽佢分享，原來不知不覺間，Ray都愛上咗藝術。所以就算Ray 尋晚無乜點瞓覺，依家都仲可以聽得到Lucy 嘅分享。

「好啦，我想帶你試飲波蘭羅宋湯[2]，係正宗嘅羅宋湯，同四月時喺香港跟你哋飲嘅茶餐廳羅宋湯好唔同！」離開藝術館後，Lucy捉住Ray 跑到旁邊嘅波蘭小店。

「妳竟然仲記得香港啲羅宋湯？！」Ray 笑問。「點會唔記得呀，嗰晚同你哋食得咁開心！我仲記得嗰日夜晚係做咩呢，嗰晚我哋喺圓廣瞓喺地上圍圈傾偈傾到凌晨……」Lucy 一輪嘴咁回憶，Ray 就靜靜地聽。

短短三日兩夜，Lucy 帶住Ray 去晒佢喺芝加哥重要嘅地方。

同朋友聚會，包括佢爸爸做牧師嘅華人教會、佢就讀嘅高中、中學酒聚……臨走嗰一刻，Lucy 喊住問 Ray ：「我哋仲會見面嗎？」「一定會，喺世界某一個角落，have（有）……」Ray 用佢半桶水嘅英文講咗半句之後，決定都係用返中文，雖然佢嘅普通話都係普通到不能再普通「有緣千里能相聚！」佢哋再次緊緊相擁，Ray 流下咗一滴罕有嘅眼淚，而佢哋同時亦心知肚明，隔咗成個太平洋，都唔知幾時先可以再面對面見到大家。

七月‧ 香港和紐黑文

「Ray，我得咗啦！我十一月會去越南交流呢！」Lucy 喺Facebook Messenger 同Ray 講。「太好喇，咁我哋就可以喺越南見，之後仲可以一齊去旅行。」Ray 收到訊息後興奮得大叫咗出嚟，腦海已經諗緊可以點樣喺東南亞周圍探索。「好呀，咁我哋再計劃。可以叫埋Luke 嗎？佢都想喺亞洲旅行呢！」Lucy 問。「係唔係我哋YUNA 新亞團二月喺波士頓見到，妳嗰位青梅竹馬嘅教會朋友？如果係佢，當然可以啦！」Ray回覆道。「好呀，咁我邀請佢先。我依家要畫畫，之後再約個時間傾行程！」

九月‧ 香港和紐黑文

「Ray，Luke 死咗……」香港凌晨時份，Lucy 打畀Ray 爆喊。

「吓？！佢兩星期前先同Lulu喺北京食完飯喎？[3]同埋我哋唔係上星期先約好年底一齊去東南亞旅行咩？」Ray 好震驚地問。「係，我都唔知點解，佢本來仲好地地，點知佢一返到哈佛就喺宿舍自殺死咗[4]……嗚嗚嗚……」Lucy一喊就喊咗三十分鐘。Ray 都唔知講咩好，淨係識得靜靜地聽。嗰一晚，Ray 通宵喺線上陪住 Lucy。

十一月‧ 河內

Ray 一到越南，即刻趕去還劍湖搵Lucy。見面時，佢哋張開雙手行近彼此，兩人相擁一刻，彼此心跳加速，小鹿亂撞，世界彷彿得返佢哋兩個咁。佢哋無諗過，分隔短短四個月後就能夠重逢，更加無諗過嘅係，會同原本約好一齊旅行嘅Luke 永遠天人相隔。嗰一晚，Ray 同Lucy 傾通宵，聽住Lucy 憶述佢同Luke嘅往事……

最後謹希望以此文：

• 獻給Lucy及Luke
• 感激Luke 作為非耶魯大學學生，仍於二○一五年二月幫忙喺YUNA（新亞書院／耶魯大學交流活動）接待新亞學生，同埋安排紐約及波士頓行程
• 紀念二○一五年一段狂緣
• 紀念與世長辭的 Luke—希望我哋來生有緣嘅話一齊去旅行
• 讓大家多多關注自己同身邊人嘅情緒健康！

Luke （右）、Lucy （中）及 Ray （左）於紐約地下鐵

 Luke

二○二三年 寫於香港

（文／楊思毅）

[1] 本文所有對話原為英文，為方便讀者閱 . 現翻譯爲中文

[2] Polish Borscht

[3] 作者家姐的暱稱是Lulu。

[4] Luke Tang 是一個受人歡迎、充滿熱誠和才華橫溢的哈佛大學二年級學生，他的自殺讓其家人和朋友錯愕不已。「Looking for Luke」（《尋找Luke》）是一部紀錄短片，講述Luke的父母Wendell和Christina，試圖通過閱讀Luke 的日記和與他最親密的朋友交談，來了解兒子自殺的原因。當他們弄清事情的來龍去脈後，他們開始發現兒子死亡的真相，並意識到抑鬱症是一種可以治療的精神疾病。（翻譯自電影「Looking for Luke」（英文簡介）讀者可按此觀看電影預告片：https://youtu.be/qipDNvyHn-8 ）

狂妄、癲狂……和「狂」有關的詞語貌似都和不能自拔有關。既然如此，就在此拙略地借用數個和「狂」有關的詞語，寫寫YUNA 的二三事，寫寫自己緣何珍視YUNA 。

輕狂

每年書院都會透過筆試和面試，選出八位同學參加YUNA，就當年設定好的主題和耶魯大學的八位同學交流。有年面試，有同學回答問題份外鏗鏘有力、擲地有聲，坐在對面的一眾面試官倒沒有招架不住，提問越發刁鑽，最後同學脫穎而出，成為當年獲選的八個參加者之一。後來有人笑說，這位同學回答問題的語氣「十足十補習天王」。

後來和這個同學閒談的時候，不難察覺到他滿滿的自信—每當談到某老教授，他會引經據典批評一番。內行人聽上去應該會覺得頭頭是道，但旁人聽上去難免覺得年少輕狂。但或許正正就是這點輕狂，他現在踏上了研讀博士的旅程。

我自己有沒有輕狂的時刻呢？總不能說沒有吧。大學二年級的時候有點眼高手低，以為自己能兼顧學業和活動，「走咗唔少堂」，主修差點就從新聞與傳播變成了YUNA。

有同學曾經對我說，那個學期我好像沒有在人文館出現過。到學期尾回看，自己便發現有許多學業上的事情沒有安排妥當，甚至拖累了一兩份小組功課的組員，歉意一直在心中。

有時候，參加YUNA 的耶魯學生也有可能給人輕狂的印象。每年參加計劃的耶魯同學都會在三月回訪新亞書院，記得有一年的行程包括會見一位時任立法會議員。事後有人分享，有美國學生和議員就不同議題唇槍舌劍、針鋒相對，火藥味濃烈。討論的詳情我已經忘記了，只記得我聽完這個經歷之後捏了一把汗。其實事後也沒有甚麼後果，怪自己多心了。

瘋狂

雖然我參加YUNA 的時候沒有依時上課，但記得有一天我為了完成功課，跟隨地區組織到街市收集賣剩的蔬菜，再觀察分發給街坊的過程。完成採訪後，我趕忙參加當年的回訪行程。

沒有記錯的話，當晚臨時多了個活動，參加一位居港耶魯畢業生舉辦的派對。那人事業有成，住在中半山，從車路到那棟獨立屋需要哥爾夫球車接駁。獨立屋景觀絕佳就不在話下，各層都能夠看到維港夜景，天台又有DJ（唱片騎師）打碟。

常常在課堂中聽到香港貧富懸殊，那是頭一遭體會到差距可以有多瘋狂。

「狂迷」

正是YUNA 的多元經歷，自己就算畢業後，仍然會找機會參與隨後數年的活動。美其名是幫負責項目的書院職員Nixon 忙，實則上是希望繼續增廣見聞。

畢業後的二○一七年，楊思毅就和我一起隨當年的YUNA行程到了上海。當時我倆常常在一行人當中殿後，負責請大家「pack實啲」，於是我倆間中會調侃對方，說大家懂的也只有這句說話……到後來在人民廣場地鐵站前往晚飯餐廳的路上，大家步速差異大，有人差點走失，我倆才發覺這句話的必要。

翌年，或許是意識到傳承的重要，有一位二○一七年參加過YUNA的耶魯同學也重回新亞，給了他、楊思毅和我三人聚舊的機會。為了爭取多點時間，思毅和我下班後就趕往機場，飛到杭州參加當年的內地行程——和「狂迷」的行為相差無幾吧？

當時內地已經盛行共享單車，所以在杭州最後一晚的時候，我們三個人才有機會在凌晨租來代步工具，夜遊西湖，欣賞風景之餘，更加可以分享個人近況和遇到的困難。經過三年疫情，現在更加明白到當時的可貴和奢侈。

今年YUNA 終於可以恢復斷絕了三年的實體交流，在農曆年前後，新亞書院的八位同學已經到訪了紐黑文（New Haven），有位在東岸唸博士的前參加者得悉紐黑文的行程過後，專門抽了整個週末，坐了八個小時來回火車，就是希望見今年的參加者一面，應該是YUNA「狂迷」無誤。而帶隊的教授早於二○一六年便曾擔任此職，今年又再挑起擔子；一想到他要投入的時間和精力，我又要多心地捏一把汗，但他應該又算是另一位YUNA「狂迷」？

狂想

口上掛着「pack實啲」，心裏有許多狂想，每每都會和楊思毅分享，例如大家都觀察到越來越多參加YUNA 的耶魯學生能夠說流利的普通話、對中國文化的認識越來越地道——這些是否就是個縮影，勾勒了香港在溝通中外文化的困境？「買辦」是否還有價值？這些討論在今天又有沒有意義？

又例如參加YUNA 的耶魯學生背景越趨多元，無論是國籍、種族或性傾向，我們每個人是否準備好如何應對？最簡單的或許是，見到一位亞裔人士，不要想當然覺得對方就是移民，而直接問到「Where do you come from?」；你得到的答案可能會是美國某個州，因為對方可能從小就在美國長大。當美國東岸各處開始有性別友善廁所，香港有沒有可能跟隨推廣呢？狂想應該會一直存在，我想YUNA 也是。

（文／龔文俊）